TEMPUS TRANSIT GELIDUM (CB 153)
 
Tempus transit gelidum, mundus renovatur,
verque redit floridum, forma rebus datur.
Avis modulatur, modulans letatur,
avis modulatur, modulans letatur
lucidior et lenior aer iam serenatur;
iam florea, iam frondea silva comis densatur.
 
Ludunt super gramina virgines decore,
quarum nova carmina dulci sonant ore.
Annuunt favore volucres canore,
favet et odore tellus picta flore.
Cor igitur et cingitur et tangitur amore,
virginibus et avibus strepentibus sonore.
 
Tendit modo retia puer pharetratus;
cui deorum curia prebet famulatus,
cuius dominatus nimium est latus,
per hunc triumphatus sum et sauciatus:
pugaveram et fueram en primis reluctatus,
sed iterum per puerum sum Veneri prostratus.
 
Unam, huius vulnere saucius, amavi,
quam sub firmo federe michi copulavi.
fidem, quam iuravi, numquam violavi;
rei tam suavi totum mi dicavi.
Quam dulcia sunt basia puelle! iam gustavi:
nec cinnamum et balsamum esset tam dulce favi!